गजल
(सवाल)
सुमित्रा वाङदेल 'चेली'
दमक, झापा
पश्चिमबाट उदाउने घाम कस्तो होला,
धेरै देखेँ कृष्णहरू राम कस्तो होला,
देश हेर्छु उभिएर सुदूर पूर्वबाट
इलामले सोध्छ सधैँ अछाम कस्तो होला,
हाँगाबाट चुँडालेर फूल टिप्छन् यहाँ
झर्या फूल चढाउने घाम कस्तो होला,
मान्छे मात्छन् धन, मान, पद, प्रतिष्ठाले
नपिइकनै भात लाग्ने जाम कस्तो होला,
गजल
(जवाफ)
रावल कृष्ण
अछाम
पूर्वपश्चिम उदाउने घाम उस्तै त हो
नियतिले लखेटेको राम उस्तै त हो ।
काँडा हाँस्छ झर्दा दुख्छ मेरो पाइलासँग
रोग, भोक, शोक, प्यास अछाम उस्तै त हो ।
मनको ईश्वर कहाँ खोज्छ फूलप्रसाद टिका
पूजा गर्ने भइगो मनको घाम उस्तै त हो ।
कलम छ नि हामीसँग किताब मधुशाला
अक्षर पिई मातौँ हामी जाम उस्तै त हो ।
गजल
जीत कार्की
चिरे धर्ती, फुटाए चाँद के भन्नू
अहो ! कस्तो बढ्यो उन्माद के भन्नू ।
भयो धरमर कठै ! हामी बसेको घर
लडेका थाम एक्लो काँध के भन्नू ।
थिए जो काख औ मातृत्वका धारा
गरे कब्जा, लगाए साँध के भन्नू ।
म ठान्थेँ जो धरोहर हुन् भरोसाका
उनै पो झन् बने जल्लाद के भन्नू ।
गजल
टङ्कप्रसाद चौलागाईं
नानु निकै पर भयौ अलि वर सरिदेऊ
मग्मगाउँदै बास्नाले सोह्र शृङ्गार गरिदेऊ ।
आँखा तर्दै, रिसाउँदै, तकियालाई अठ्याउँदै
प्रेमीको स्वागतार्थ पलङछेउ झरिदेऊ ।
थाकेको यो शरीर सम्पूर्ण सुम्पिदिन्छु
मनभित्रको प्रेमाग्नि चारैतिर छरिदेऊ ।
पन्चेबाजा, डोली चढ्दा कति राम्री देखिएकी
त्यही लुगामा सजिएर सिउँदो रातै भरिदेऊ ।
artisttanka@gmail.com
